警告：珍惜士途，在本文留言前請三思！路過覺得精彩的，小弟心領，不必冒險留言，以免蒙受不必要損失。
「催谷階層上位信我話咁易！」
大家好！句警告又繼續存在，等大家係最唔方便欣賞本系列的日子同地點，一樣可以倍安心兼清爽，日用夜用都咁舒適。早陣子較忙停了一陣，但系列繼續，今期我地真高階，深入研究平民成為名士兩大可行方案，首先，當然係我地教過好多次的「做雞」，今期，會詳細同大家分享做菠羅雞的心得，另外，重會追加另一新招，「做蟲」，「做雞又做蟲，上位唔技窮！」
一隻成功的菠羅雞，夠黐當然係必要條件，最緊要係黐得其所，黐對門路。西瓜倒大邊，第一原則，當然係唔大唔食，唔好走去深山搵高人或唔係高人，因為你唔係劉備，唔需要孔明，你需要的，叫「出名」，唔好搞錯。點可以選到好路數呢？有三個因素：
1. 可撈性 ：即係黐過去係唔係有得撈？咩叫有得撈？即係會唔會拿到著數，例如：搵工、貼士或者靚女。記住，可以實化的先叫有用！人流唔係著數一種，請勿胡亂作不當投資。
2. 可交性：目標的人際關係，如果目標得罪人多、稱呼人少，甚至是人所共知的黑五類，就要避之則吉！記住要選戰友多的，不要選朋友多的，戰友，係唔講立場只講目標，亦係一隻雞的最佳目標。
3. 可攜性：宜多觀察目標是否有提攜"戰友"的傾向，或者有聚集戰友的興趣，如果有的話，絕對係一流之選，快快飛身去做雞，掂！
之後，就可以盡情出現，增加曝光率，成為一隻金雞，閃閃生輝，名滿天下！恭喜恭喜！做雞，係一門值得尊敬的高深學問，要做得成功，真係唔易，所以我奉勸各位，唔應該歧視「做雞」上位的人，佢地有付出架。對雞擅奇才應該封以相符的雅號，頒發「黐雞獎」，以表揚該界別的祟高專業精神及對揚名立萬的決意。
今日講另一樣，做蟲，境界比做雞更高，做雞，都係搵位出鏡，做蟲直頭係應聲蟲，好聽叫「同仇敵愾」，難聽叫「跟班阿四」，不過，點尊稱唔係重點。令人留意同認同先係真正重點，做蟲有以下幾類：
1. 好蟲：不論目標說什麼，都讚好！簡單又易做，不妨多嘗試。
2. 戰蟲： 凡見目標有什麼反對聲音或者疑似中傷又或者疑似質疑，馬上狂插，理據方面都唔使點想，都係其其求求，其至九唔搭八都得，志在表態。反正內容根本無人理。做戰蟲難度比較高，要睇清楚目標同勢力，站錯邊，做唔成戰蟲，變了賤蟲，超陰公。
3. 捉蟲：比戰蟲更高一級，留意目標有什麼「看不順眼的」，就捉佢出來搞下，主動出擊，前途無限！
做蟲係一個專業，記住，「忍一時海闊天空、擦兩擦前途無限」，先至係高知能蟲蟲。有志揚名的各位朋友，不妨每朝大叫「我要做好隻雞蟲！」！今期又唔知有冇高人拿去自行解讀(?)一番，雖然有我都未必知或者未必留意。好，今期名士谷階教室就寫住咁多先，下次節目時間我地再玩過！祝大家上位成功，士士享通！
正式散場前，要答積壓左幾期的讀者信來信。為存忠厚，所有讀者名字都會打格。
忠實讀者想發達：點解個系列無左，係咪你收受左利益之後唔寫！
騙緝部：哩位忠實讀者，查實我日日都想收受利益之後收山，但至今仍然分文未取，所以，今日又有新一篇。
忠實讀者想出名：你成日叫人做名士，咁做名士有咩好處呀？
騙緝部：以我所知都係拯救下地球、維持下宇宙和平、為人類幸福作出貢獻同打擊下無良粉皮咁啦。詳情我都唔知，因為我無興趣做，只有興趣教人去做。
讀者執執地：你拉抬人氣寫哩聽野，重有冇良心架？正xx！
騙緝部：唔洗勞氣，本店出口係洗手間左邊，直行轉左就見到。建議臨出門口前，買番盒菊花茶降火，唔好咁睇唔開啦，又唔係同你搶飯食！定係我唔覺意搶到你飯碗呢？
