晉身網誌名士，首先要寫好網誌？別傻了！名士，名為先，士為後，有功為士，得個做字。有名方為名士，但一般魚旦粉，識你老鼠，如何可以揚名立萬稱王稱后呢？無錯，就係識得「玩交人」，搭上名士，被名士肯定，就可以晉身為名士，但人地堂堂名士，理你都有味，點樣可以擠身「名士風流、拯救地球」之列呢？等我又幫大家出謀獻計！
首先，一定要增加曝光率，遇有任何BLOG壇大事，網上又好，真身又好，出到傳媒更好，一定要逢「SHOW必到，有早無遲」，記往要搶頭位、霸個當風的窗戶，可以嘗試扮晒主家席，當然，以唔好被人轟出門口為底線。更緊要，係要爭取發言，內容以行貨及模稜兩可為主，盡量不致可否，扮晒有深度！出席得三五七次，見到幾個名士，就可以朋友前戰友後的稱呼他們，旁人就自然覺得你識得好多"猛人"，當正你名士一份子！
網上討論，沿用同樣原則，牆頭草，兩邊倒，扮晒和事老。討論幾回之後，又可以來一招「必殺菠蘿雞」，人人都認係「戰友」，嘩，咁多老友，邊個敢當你無到？最緊要記得，人撐你又撐，人踩你又踩，咁先係戰友遍天下，相識全宇宙的光明大道！大家請三呼萬歲！
雖然，做名士一定要濫交，但千祈唔好錯交人，交錯一些閉門造BLOG的無謂人，就白白浪費閣下寶貴時間，好陰公。什麼叫閉門做BLOG呢？就係那些只寫自己興趣，又唔參予社群活動果聽(例如，某某黑BLOG)，正一浪費交人資源，千萬不要花時間在這類「無謂人」身上！
有事必參予，但不代表有建樹，盛事必見影，但又唔代表會幫手。成為「攝石人，無從抗拒的人」，名成利就的康莊大道就在你眼前，大家請敬禮！！咩話？你唔鐘意做攝石，又唔鐘意交人？唔驚！下期「暗黑谷階名士研究」會公開我閉關修練二十四小時後開發出的終極必殺技，敬請期待。
「做名士，上位話咁易！點黑路，看我教精你！」
叫完口號，今日節目時間又到，暫定下周五再見！
