注意：產品內容及定價只供參考，一切以店家公告為準！
大冒險打頭陣，梗係大野！奸妃雞最新鉅獻「加大碼雞髀皇餐」，個名夠偉大，亦的確偉大，原因唔係隻雞髀，唔係杯加大汽水，而係個24.80的定價！
整個快餐PhotoHunt玩下先：
無得講，杯汽水確係大，隻雞髀亦唔係小兒科，入口重有少少肉汁，雖然唔算上品，但品質好到嚇親我。個飯賣相認真麻麻，例牌地出界，米質一貫地略糊口，配料份量係「照片只供參考」，叫做塞得飽個肚，同真係好多飯咁啦。24.80當午餐，完全食飽，唔係太雷，可說是本周快餐填肚精選。
當然，食之前或之後，建議你唔好去睇《毒食難肥》或者記起有關劇情。
鏡頭一轉，升呢，豪少少，殺去一般包王。包王新品「Angry Whopper」幅廣告相係威係勢，著晒火，又話有三級辣度，唔挑佢，點得呀？
四十一元套餐，有「Angry Whopper」乙個，例牌薯條，同......又加大汽水？OMG！咩都唔講，大家一睇杯汽水，就知咩叫浮誇。薯條介紹過N次，雖然今期過晒火，照略過。馬上入正場，「Angry Whopper」！
包側的一點辣汁，令人有萬聖節感覺，真可愛。對一個只係加辣汁同辣椒的Whopper，唔應該有太大期望，但所謂辣度，實在得啖笑，三級最辣，食完，我只覺得比一般Whopper香口少少，辣？Sorry，唔覺！
包本身保持一水準，想食辣，算吧，我對佢辣度有幻想，係自己蠢。個餐有咩優點？大杯水加大個包，飽到上心口。今期有個推廣係自拍怒爆照放上Facebook參加比賽，我想好怒爆咁講「個包唔「夠」辣呀！」
一不離二，二不離三，大完兩場，殺去最後一場，壓軸的，當然是暗黑力量。無錯！老麥翻兜產品，珍寶暗黑漢堡！今期套餐要廿八元有多，都幾貴。
個盒升呢，靚仔，不過唔食得。你睇，四塊牛肉都可以隱藏係麵包入面，係咪好強大呢？
四塊牛肉加埋都唔知夠唔夠一個Whopper，肉味方面，有提的必要嗎？
跟將軍一樣，哩期興乾水，黑椒汁大為縮減，令味道變得好啖，加上黑椒堡本身冇咩其他配料，係一個「真堡Dry」，看來唔叫多汁，真係唔多掂。
暗黑，就要徹底，要給我好好黑下去才對！下次試次多汁，唔得，就Bad List，講完！
