注意：產品內容和定價只供參考，一切以店家公告為準！
首先登場，係濫出新款到我想投訴的「大塊活」，今期新口味叫「鑊仔中華料理」，黑椒牛仔骨配合咩咩點子飲品，加多個蒸飯要......四十七蚊？標錯價呀？三十八蚊係上限啦！好！你夠膽賣咁貴，就見識下有咩把炮！
一如所有大集團貴野，買完，要等近十分鐘先有得食，勁唔快餐。實物，係以下哩個樣：
鑊仔有四大塊牛仔骨，骨同肉的比例好均衡，估計有50/50，搞到我考慮咁點可以咬骨，味道方面，我未試真佢得唔得之時，已經食晒。側邊有一堆日式雜菜，好伴碟款，味道同樣都唔會令人期待。
個蒸飯，睇個樣冇問題，好華麗，又有木魚又有蟹子，重九唔搭八地塞幾件天婦羅入去(!!)，單講味道，其實唔算難食，但，質地嚴重乾硬化，硬到有如生米，好中肯咁去形容，係：惡啃，或者：好惡哽！地雷度保守估計達到65%！掃雷愛好者必試！
杯咩咩巨峄點子，有幾粒類似椰果物體，味道大家都估到，唔會太難頂。但絕對非一般馬虎，極限地求其，雞過老麥夏天個巨山峰新地。
個餐係咪一無可取？都唔算，個醬汁都幾好味，無錯，就只係得個醬汁食得下。
哩個餐完全係一個惡搞，可能係用來整鬼食客的萬聖節特選！對荷包地雷指數高達95%！！非常危險！！建議閣下錢多可捐去慈善機構或者送我，唔好貼錢買難受！
鏡頭一轉，我們去到拮野食火鍋，秋冬又到食牛肉鍋的時間，今年賣價要四十六，轉飲綠茶紅豆冰加六蚊，即係五十二，其實哩個價去些街坊小店，都食到日式牛鍋了！
組合都係咁上下，牛肉一碟仔，加個鍋，有個福袋年糕，有底烏冬。湯汁鮮甜，烏冬夠多，菜都算爽，店員密密四處視察，加湯開火熄火都好快有人幫，唔會如上次係大集團咁煲乾水都冇人理，味道方面，都係好正路的日式牛鍋味道，醬汁味甜甜地，牛肉看起來少，吃起來其實不少，難得完整，好過兩大集團整食整水加菜底扮多肉。
烏冬OK多，品質良好，彈彈地牙。成個鍋雖然冇整色整水加貴料扮上等，但老老實實
杯綠茶紅豆冰，冇咩特別，勝在冰唔係大粒到啃死人，又唔係太甜，味道可以，加六蚊就差少少，客觀來講，唔及兩大集團的酸梅湯貼心。唯一想講，哩個價，可唔可以多隻雞蛋呢？
