注意：食品內容及定價只供參考，一切以店家公告為準！
首先登場，係老麥早餐新品，板燒雞扒蛋包，即係親子包或者子母雞？食完大重要食細，好殘忍的萬聖節應節食品！(笑)加一蚊升呢做麥咖啡，全套埋單，二十一元三角正，今日快餐價，就係貴。
包係我最愛的「老麥包皮」英式鬆餅，蛋同平時豬柳蛋一樣，雞扒係板燒雞包的縮水版，另外加少少生菜同沙律醬，入口唔夠豬柳蛋包爽，有少少糊口，加上有汁有菜，機動性唔及豬柳蛋，邊行邊食，好易搞到一身係。薯餅都係薯餅，普通貨仔 。
咖啡加一蚊升級做麥咖啡版，最大進步，係個杯同包糖的包裝，味道偏苦澀又有酸味，亦唔夠香，完全達唔到咖啡室應有水準，其實，升呢後味道同平時唔覺有太大分別，一蚊買包裝？
之後到包王新品，今期我們殺入機場包王，據稱品質較高，試的新品是雙層香辣黑椒漢堡，暗黑包，點可以唔試？上次試過包王的把鬼三層包後，我決定唔會再定佢設定的三層包，所以今期只試雙層，套餐價43蚊，例牌包汽水同薯條，例牌質素，我們就先略過唔講。特別價惠係加五蚊配原價十蚊的蘋果批，殺埋！
蘋果批仍然係偏甜，玉桂味冇老麥咁香，五蚊可以接受，唔可以算好食。
雙層暗黑包，「晒屎」比較細，斷估應該大唔過老麥個至尊，顏色好暗黑，似墨汁，但，Sorry，味道一點都不熱血(!!!!!!!!!!)，似加左少少少少少少少少少黑椒的豉油，成個包，唯一可取係上面果幾條洋蔥，OK新鮮。雖然肉同包保持水準，但個汁實在係失敗中的最失敗，香辣？香？辣？萬聖節應節嚇鬼惡作劇呀？
老麥果個暗黑包，好食過佢N倍，包王這新品可列為「BAD LIST必然正選」等級，實在有辱暗黑界之名聲！
