注意：食品內容及定價只供參考，一切以店家公告為準。
今期老旺人龍大熱，應該都係哩間(肥)姐(主)理鹵味，長時間有五六人以上長龍，還要限量購買，認真威威。雖然我一向少理鹵味，但見人頭湧湧，都係試試啦！
跟機一陣，十五大元，取得生腸及雞腎各一串。腎柔軟度一流，入口唔會死硬咬唔開，味道比較淡，加上芥辣就非常一流，果然唔錯！生腸夠凍夠爽口，口感奇佳，但味道都係偏淡，加醬食非常可口。果然有料到，唔怪得靚女猛男老人家都齊齊跟隊！
店名：肥姐小食店
地址 ：旺角登打士街55號4A舖
Openrice ：肥姐小食店
食完，梗係要飲，轉個彎見到新店「阿媽豆腐花」，凍豆漿只係六蚊杯，以旺角來講超平。聲稱來自元朗，不過豆漿來自邊度都冇所謂啦！
六蚊標準杯，份量唔少，唔見得比係七仔買支裝飲品貴，味道偏啖，唔算甜，豆味可以，比「人字頭豆品」的好味得多，比台式飲品們便宜一大截，值得一試。下次，我會試試其他口味飲品。
店名 ： 阿媽豆腐花
地址 ： 旺角登打士街43H號登打士廣場地下
Openrice ：阿媽豆腐花
飲完，又想食，撞鬼！忽然，想食臭豆腐，於是係登打士街行來行去，研究一輪，覺得哩間臭味應該係附近店舖之冠，於是就試一件。
臭味都算可以，起碼行過聞到陣陣味。爽脆程度就勉強合格，但入口就比較一般，臭豆腐那種獨特的酸臭味唔夠濃，香味夠但食味唔夠濃，重口味臭豆腐fans未必滿足，比較適合入門食家試試。水準一般，勉強可以頂到癮。同店其他產品賣相麻麻，只要一件臭豆腐就再上路去。
店名 ： 真美味小食專家
地址 ： 旺角登打士街43號D6號舖
Openrice ：真美味小食專家
食完，又要飲，頗愛「快樂檸檬」的燒珍奶茶，來一杯吧！
此店飲品五顏六色，真正花多眼亂，不過我份人唔係太「好色」，還是要回最喜歡的「燒珍珠奶茶」。
杯奶茶其實一般貨仔，奶味太重，珍珠特別香口惹味，總令我忍唔住要一杯，講真，十一蚊，幾貴。
店名 ： Happy Lemon
地址 ： 旺角洗衣街109號皆旺商場地舖
Openrice ：Happy Lemon
重好肚餓？點算？章魚丸同燒餅之前食太多，厭了！隨意多吃要一串燒賣後，收隊去食快餐去。食左四草幾五草野，完全唔夠飽，我懷疑，掃街要食飽，可能貴過酒店自助餐！
