注意：本文內容涉及洩憤及負面思想，可能會有不當不雅用語，只宜18歲以上讀者觀看，多謝合作。
頂你廢出閘機
出閘機偶爾會廢左， 飛身出閘時太心趕就會被頂到應一應，自己撞鐵通的無情力，實在痛入心肺。當然，有時係部機「遊戲」，係出閘位仁兄仁無睇清楚部機原本已經廢左，重盲丙咁衝過去，唔好怪機玩人，實在只係人玩人。
碌七戲售票機
聲稱可以碌信用卡的戲院售票機，就算個touch screen唔壞，通常碌卡位都失靈，碌七次都碌唔到，最後只有好low tech咁死死氣死去排隊買飛，又是「遊戲」機經典。結果，我只係敢用佢來查下場次，買飛都係敬而遠之。
冇銀用提款機
世間最谷氣的事之一，就係排左好耐隊，埋到提款機面前，先發現部機竟然「無銀用」，那份遊戲感真是無與倫比，一試難忘。最好，都係非繁忙時間非繁忙分行時提定款！
你老鼠指紋機
出關入關又或者好多公司都有指紋機，偏偏好多時候佢地都識你老鼠，令人進退失據，欲入冇門！通常哩類機都唔太鐘意粗暴的人，大家使用時不要按得太死太大力，可以略略減少識你老鼠的機況。
噴無能水龍頭
壽司店的水龍頭總算細水長流，一杯細細杯的熱水，可以搞成半分鐘都未滿，雖然話安全第一，都唔使慢成咁呀？你唔好逐滴出？
拒老無上網機
各大商場提供的上網裝置，最大功能唔係比客人上網，而係比人「維修」，想借機用用，十次有八次都維修，哩類拒絕客戶、老係無得用的上網機，其實係藝術展品來架？
充斥我們日常生活還有好多種「遊戲」機，希望大家每天可以少被它們捉來玩遊戲吧？
